Khanakorn Pianchana është gjykatësi tajlandez, që tentoi të vetëvritej ndërkohë që akuzoi eprorët se po i ndërhyjnë në marrjen e vendimeve gjyqësore.
Pasi liroi pesë të akuzuar, tre prej të cilëve mund të dënoheshin me burg të përjetshëm, ai nxori revolen dhe e qëlloi vetën në gjoks, para të pranishmëve në sallën e gjyqit që ndodhet në Yala të Tajlandës, raportoi Telegrafi. Atë e dërguan me shpejtësi në spital, ku po trajtohet nga mjekët, ndërsa ka gjendje të mirë shëndetësore.
Në një memoar prej 25 faqesh, që ka nisur të qarkullojë në internet, thuhet se eprorët e tij përpiqeshin t’ia ndryshonin vendimin, që të akuzuarit të shpalleshin fajtorë.
Këto dokumente ishin postuar në llogarinë e Pianchana në Facebook, krahas një video ku ai i akuzonte eprorët për ndikim në vendime. Z yrtarët e gjykatës ku ai shërbente, thanë se veprimet e tij ishin pasojë e stresit dhe gjendje momentale mendore ndërsa njohësit e ligjit thonë se ai ishte nën presionin e eprorëve ndërkohë që sistemin gjyqësor e konsideruan të manipuluar.
Sistemi gjyqësor tajlandez, është konsideruar për shumë vite si i korruptuar, ndërsa tani besohet se është në ndikim të madh edhe nga faktorët politikë.
