Pasi u njoh me 10 akuzat që rëndojnë ndaj tij, ish-presidenti i Kosovës, Hashim Thaçi iu përgjigj gjykatësit shumë i prerë.
“I dëgjova dhe i hedh poshtë të gjitha akuzat”, tha Thaçi.
Një sekretar i Speciales i ka lexuar akuzat e rënda ndaj Thaçit për krime lufte dhe krime kundër njerëzimit.
Gjykatësi, Nicolas Guillou i ka thënë Thaçit se seanca e sotme nuk është për të kontestuar akuzat ndaj tij.
Të enjten e javës së kaluar, ish-presidenti Hashim Thaçi, bashkë me ish-kryetarin e PDK-së, Kadri Veselin dhe shefin e Grupit Parlamentar të LVV-së, Rexhep Selimn u nisën me një avion për në Dhomat e Specializuara në Hagë. Një ditë më parë, ish-kryeparlamentari Jakup Krasniqi ishte arrestuar dhe ishte dërguar për në paraburgimin e Dhomave të Specializuara.
Arrestimet erdhën pasi një gjyqtar i procedurës paraprake i Gjykatës Speciale, ka konfirmuar aktakuzat ndaj katër ish-krerëve të UÇK-së.
Sot para gjykatësve në Hagë është paraqitur edhe Jakup Krasniqi, i cili tha se është i pafajshëm për akuzat që e rëndojnë nga Specialja.
