Ish-deputeti socialist, Alqi Bllako është lënë në burg nga GJKKO, e cila ka caktuar masën “arrest me burg”, pasi u arrestua për “korrupsion” dhe “shpërdorim detyre” në lidhje me aferën e inceneratorit të Fierit. Seanca ka nisur në orën 11:00 dhe u zhvillua me dyer të mbyllura, pa praninë e mediave. Ish-deputeti u dërgua në ambientet e GJKKO para orarit zyrtar të nisjes së seancës, duke iu shmangur sërish mediave.
Avokati mbrojtës i tij, Sokol Hazizaj tha se Bllako vetëm ka përcjellë dokumente dhe u shpreh se gjykata nuk njeh kodin e procedurës administrative. Sa i përket akuzave të SPAK se Bllako ka udhëtuar me Klodian Zoton, Hazizaj tha se nuk është provuar që bileta të jetë blerë nga Zoto.
Sokol Hazizaj: Nuk është prodhuar akti nga Alqi Bllako. Ai ka përcjellë vetëm dokumentacionin, ndaj e thashë që pretendimi jonë është që nga kjo gjykatë nuk njihet kodi i procedurës administrative.
Kjo nuk u përmend dhe mendoj që kjo nuk është provë bindëse sa kohë që nuk është provuar që bileta është blerë nga Zoto për Bllakon.
