Gjykata e Lartë shpall moskompetencën për gjykimin e dosjes “Doshi- Frroku- Bami”. Procesi do të rikthehet në Gjykatën e Krimeve të Rënda për shkak të ndryshimeve ligjore. Kjo është dosja e 3-të që kalon për gjykim tek Krimet e Rënda.
Vendimi është dhënë të enjten bazuar në ndryshimet ligjore në Kodin e Procedurës Penale, pjesë e reformës në drejtësi. Sipas këtyre ndryshimeve, kjo çështje nuk mund të gjykohet më nga Gjykata e Lartë pasi kompetencën për shqyrtimin e saj e ka Gjykata e Shkallës së Parë për Krimet e Rënda.
Të pandehurit Tom Doshi, Mark Frroku dhe Durim Bami akuzohen nga prokuroria për “kallëzim të rremë”. Sipas prokurorisë, ata dyshohet kanë shpikur historinë e atentatit ndaj deputetit Tom Doshi.
Procesi ndaj tyre në Gjykatën e Lartë kishte nisur prej më shumë se një viti ndërsa tani, Krimet e Rënda pritet të fillojnë shqyrtimin e çështjes nga e para.
