Ministrja e Drejtësisë, Etilda Gjonaj i dha një mesazh të fortë kryedemokratit Lulzim Basha. Gjonaj kritikoi opozitën nga foltorja e Kuvendit, duke e akuzuar se është përpjekur të bllokojë Reformën në Drejtësi dhe procesin e Vettingut në sistemin gjyqësor.
Sipas ministres Reforma në drejtësi ka nisur të japë efektet e para pozitive dhe ajo tashmë është e pandalshme.
Ndërkohë më parë PS-ja i ka bërë të ditur Bashës se imuniteti i tij në krye të kësaj partie është i përkohshëm, pasi do ta rihapë çështjen dhe do ta akuzojë sërish për vjedhjen e 230 milionë eurove në Rrugën e Kombit, për marrëveshjen e detit me Greqinë dhe mbi të gjitha, për vrasjet e 21 Janarit.
Basha i shpëtoi gjykimit me procedura, ndër të cilat mbahet mend përdorimi i raporteve mjekësore nga Basha si pamundësi për t’u paraqitur në seancat hetimore. Vonesa në dërgimin e dosjes në Gjykatë ishte ajo që mbajti Bashën larg dënimit, por jo për shumë kohë.
“Në sistemin e ri të drejtësisë, askush nuk do të ketë mundësi t’i fshihet drejtësisë, duke përdorur akrobaci procedurale, siç keni bërë deri tani dhe as të përfitojë në kurriz të qytetarëve të pambrojtur dhe pa pushtet ekonomik e politik”, është shprehur Gjonaj, duke i drejtuar në këtë mënyrë një paralajmërim të drejtpërdrejtë kreut të PD.
Ministrja më tej i është referuar reformës në drejtësi, si një pjesë e rëndësishme e shtetit social, të cilën tha se po e realizohet për qytetarët, që të mos shpenzojnë më kohë në procese të blera gjyqësore, të mos zvarriten më dyerve të gjykatave dhe të rifitojnë të drejtën e tyre të nëpërkëmbur prej dekadash.
