Gjirokastra po shfaqet gjithnjë e më shumë si një prej destinacioneve më tërheqëse për turistët e huaj që udhëtojnë me motoçikleta, veçanërisht gjatë stinës së pranverës. Me rrugët karakteristike me kalldrëm, itineraret malore dhe peizazhet mahnitëse, qyteti i gurtë ofron përvojën e përsosur për adhuruesit e motoçiklizmit dhe aventurës.
Grupe motoçiklistësh nga vende të ndryshme të Evropës, si Franca dhe Italia, kanë mbërritur ditët e fundit në qytet, duke zgjedhur të përshkojnë Shqipërinë me dy rrota. Sonja, një turiste franceze pjesë e një grupi prej nëntë motoçiklistësh, shprehet e entuziazmuar nga vizita:
“Është një vend i mrekullueshëm, vizituam kalanë, një monument shumë i bukur me një pamje mbresëlënëse. Për fat, sot është mot me diell dhe po e shijojmë shumë vizitën këtu.”
Edhe një grup motorristësh nga Italia shprehen të impresionuar nga bukuritë natyrore dhe historike të Shqipërisë.
“Mendoj se është një vend i bukur. Këto ditë po udhëtojmë nëpër Shqipëri, kemi qenë në Vlorë, Sarandë… qytete të mrekullueshme”, tha në ata.
Turizmi i aventurës po fiton gjithnjë e më shumë terren në Gjirokastër, falë kombinimit të trashëgimisë kulturore me natyrën e egër dhe të paprekur. Ky trend pritet të forcohet edhe më tej gjatë muajve të verës, duke e kthyer Gjirokastrën në një pikë referimi për udhëtarët që kërkojnë përjetime ndryshe dhe liri në lëvizje.
