Ministri i shkarkuar i Infrastrukturës dhe Energjitikës, Damian Gjiknuri ka zbuluar se kur do të përfundojë rruga Tiranë-Elbasan.
Në një postim në Twitter, Gjiknuri ka lajmëruar se kjo rrugë me rëndësi për qytetarët do të përfundojë në pranverë dhe do të jetë e hapur për të gjithë drejtuesit e automjeteve.
“Pas zgjidhjes së ngërçit dhe sigurimit të financimit, punimet po vazhdojnë në kantierin e rrugës Tiranë-Elbasan. Aktualisht, ka mbetur pa u kryer vetëm 6% e volumit total ndërsa brenda pranverës rruga do të jetë e hapur e me të gjitha parametrat e duhura”, shkruan Gjiknuri.
Kujtojmë se më herët, Gjiknuri dha fjalën se rruga do të përfundonte në dhjetor të 2018-ës, përndryshe ai do të jepte dorëheqjen.
