Në futboll gjithmonë rivaliteti mes dy ekipeve është shumë i madh, aq më shumë kur përballen në një finale. Këtu po flasim për një “El Clasico”, e cila gjithmonë është e zjarrtë edhe në ekipet e moshave të reja. Por duket se të vegjlit e Barcelonës apo Benjamin A dhe ata të akademisë së Real Madrid kanë një marrëdhënie tjetër.
Katalanasit dolën kampion në finalen e “Iscarcup Medina”, por gjesti që bënë pas përfundimit të ndeshjes po bën xhiron e botës. Pas përfundimit të finales, djelmoshat e rinj Madrilen filluan të dëshpërohen me rezultatin ndërsa veprimi i djelmoshave të akademisë Blaugrane bëri bujë të madhe në mediat botërore pasi ata në vend se të festonin titullin e fituar, nuk ngurruan aspak të ngushëllonin pas humbjes lojtarët e rinj Madrilen duke treguar një sportivitet maksimal.
