Ministrja e Zhvillimit Urban, Eglantina Gjermeni, ishte e ftuar sot, në takimin e parë kombëtar mbi krijimin e rrjetit të bashkëpunëtorëve “BRIGAID”, organizuar nga Agjencia Kombëtare e Planifikimit të Territorit, në bashkëpunim me Ambasadën e Vendeve të Ulëta në Tiranë.
Në fjalën e saj, ministrja Gjermeni u shpreh se në këtë mandat të parë qeverisës reformat që janë ndërmarrë në kuadër të planifikimit kombëtar dhe vendor, apo dhe zbatimit të projekteve konkrete, siç është edhe rasti i Projektit BRIGAID, formësojnë vizionin “Shqipëria 2030”.
Konkretisht, të tre planet kombëtare të miratuara tashmë prej më se një viti, ofrojnë piketat për hartimin e projekteve konkrete strategjike, që garantojnë menaxhimin racional të tokës dhe burimeve natyrore, si dhe harmonizimin e të gjithë faktorëve që ndikojnë në jetën social-ekonomike të qytetarëve.
Sipas saj, qoftë tre planet kombëtare, si dhe planet vendore, që brenda vitit 2017 do të jenë të hartuara për 43 bashki, ndërsa brenda vitit 2018, ne angazhohemi ta përmbyllim këtë proces, edhe për 18 bashkitë e tjera, përcaktojnë qartazi zhvillimin që do të marrë territori në 15 vitet e ardhshme, në shërbim të rritjes së sektorëve kryesorë të ekonomisë kombëtare si: turizmi, bujqësia, energjetika, transporti.
Qëllimi i projektit “Brigaid” është përthithja e ideve inovative mbi tre komponentë kryesorë të ndryshimeve klimatike si: përmbytjet, thatësirat dhe moti ekstrem, një nismë kjo që lidh inovatorët, kërkuesit, akademinë, njerëzit me ide me institucionet, nëpërmjet disa produkteve që japin zgjidhje praktike e të shpejta në situatat e katastrofave.
