Ambasada gjermane në Tiranë ka reaguar në lidhje me ardhjen e vaksinave anti-covid në vendin tonë. Përmes një njoftimi, ambasada shprehet se nuk disponon informacione lidhur me dërgesën e bërë më 11 janar.
Më tej, thuhet se Gjermania do të vazhdojë të mbështet Shqipërinë në përballimin e pandemisë nëpërmjet dhurimeve materiale dhe trajnimeve në fushën mjekësore.
“Ambasada nuk disponon deri tani informacione të mëtejshme në lidhje me vaksinën e dërguar më 11 janar 2021. Gjermania e ka mbështetur Shqipërinë në përballimin e pandemisë së COVID-19 e angazhuar dhe ne mënyra të ndryshme.
Kjo ka ndodhur (dhe po ndodh ende) përmes dhurimeve materiale dhe trajnimeve në fushën mjekësore, ndihmës së drejtpërdrejtë për shtresat në nevojë te popullatës dhe përmes një pakete prej më shumë se 10 milionë eurosh, ndër të tjera për këshillimin e ndërmarrjeve të vogla dhe të mesme për riorganizimin pergjate krizës si dhe financimin shtesë te Rural Credit Guarantee Foundation.”, shprehet ambasada.
Sipas një dokumenti të publikuar ditën e sotme, u bë e ditur se Gjermania ishte vendi që vendosi dhurimin e 975 dozave të vaksinës Pfizer në Shqipëri.
Kryeministri Edi Rama nuk pranoi të thoshte vendin që dhuroi vaksinat, pasi sipas tij, kjo ishte një kërkesë e vetë shtetit dhurues.
Ditën e djeshme filloi vaksinimi kundër Covid-19 edhe në vendin tonë. Të parët që u vaksinuan ishin drejtoresha e Spitalit Infektiv, Najada Çomo, kryeministri Edi Rama, dhe mjekët e njohur infeksionist, Pëllumb Pipero e Tritan Kalo.
