Pronarët e gjashtë televizioneve kryesore private kanë propozuar një plan për të përfituar fonde publike, me qëllim transmetimin e një imazhi televiziv më cilësor, si edhe informacione më të besueshme.
Njoftimi u bë publik në mbledhjen e datës 11 qershor, mes përfaqësuesve të mediave dhe kryetarit të Autoritetit të Mediave Audiovizive, Gentian Sala. Por, një nga anëtarët e AMA-s, Zylyftar Bregu thotë për Tirana Today se ata nuk janë në dijeni të këtij propozimi dhe se ata nuk u thirrën për të qenë pjesë e takimit.
“Unë këtë diskutim e kam mësuar vetëm nëpërmjet medias. Pasi lajmi doli në media, kam pasur interesime edhe nga miq e kolegë, por ende nuk e njoh projektligjin. Ndaj nuk e di formulën që është propozuar.
Se pse nuk është bërë një mbledhje mes Gentian Salës dhe anëtarëve, duhet të pyesni vetë kryetarin e AMA-s. A do të ishte më mirë që anëtarët e AMA-s të ishin atje? Unë them që po, do të ishte shumë më mirë të ishim atje. Por, nuk i di arsye përse kryetari i AMA-s e ka gjykuar në këtë mënyrë.
Bashkë me kolegët e tjerë të AMA-s bashkohemi me shqetësimin për tu njohur sa më shpejt me këtë projektligj dhe të njihemi me rolin, statusin e qëllimin se përse AMA është përfshirë në këtë proces. Pasi, AMA në vetvete nuk miraton ligje apo taksa.”
Ndërkohë që muaj më parë u propozua një rritje e taksës që shqiptarët të paguajnë për RTSH-në dhe sot kur flitet për një taksë që duhet t’i paguajmë mediave private; ende nuk dihet se sa do të paguajnë shqiptarët për të parë televizionet shqiptare.
“Nëse këto vendime do të miratohen, nuk besoj do të paguhen dy taksa, mund të paguhet një taksë, por mbase më e lartë,”-shton Bregu për Tirana Today.
Përgjatë 20 viteve të fundit, çdo familje shqiptare paguan 100 lekë në muaj tarifë për aparatin televiziv. Tarifa mblidhet bashkë me faturën e energjisë dhe ka shërbyer për financimin e Radio-Televizionit Shqiptar. TIRANA TODAY
