Kreu i Këshillit të Lartë të Prokurorisë, Gent Ibrahimi, ka folur rreth krijimit të SPAK-ut, teksa thekson se institucioni që ai drejton ka miratuar listën me 15 kandidatë.
Gjatë fjalës së tij në seancën dëgjimore në Komisionin e Pavarur të Monitorimit të Zbatimit të Ligjit për organet e qeverisjes në sistemin e drejtësisë, Ibrahimi shpjegon se SPAK nuk është formuar ende, pasi anëtarët duhet të kalojnë procesin e vettingut.
“KLP ka miratuar listën prej 15 kandidatë për anëtarë te SPAK. Ende sot nuk ka SPAK sepse ende nuk ka përfunduar procesin e vettingut me vendim te formës se prerë. KLP do i duhet të marrë vendim nëse mundet që SPAK te krijohet me më pak se 10 anëtarë, apo ka imponim kushtetues. Na takon ne te themi nëse është e mundur apo jo që SPAK të nisë me 10 anëtarë. Ne marrjen e këtij vendimi do na duhet të marrim parasysh edhe disa elemente praktike”, u shpreh Ibrahimi.
