Autorët e ekzekutimit të Everest Çakës të ndodhur mbrëmjen e djeshme në Elbasan, duket se kanë bërë gabimin e parë në lidhje me këtë ngjarje të rëndë.
E ftuar në emisionin “Opinion”, gazetarja Klodiana Lala ka zbuluar se një person ka parë gjithë skenën e vrasjes dhe ka përshkruar identikitin e autorit tek Policia e Shtetit.
Sipas dëshmitarit okular, vrasjen e ka bërë një person pak i shëndoshë dhe me gjatësi mesatare, por nuk i ka dhënë asnjë fjalë viktimës.
Klodiana Lala: “E shoqja punonte në një institiucion shtetëror. Autori është njohës i zonës pasi nuk është kapur nga një kamera në momentet e para të ndalimi por vetëm në Bradashesh. Një person thotë në momentin që u godit, ka qëlluar një person i mbushur, jo shumë i gjatë dhe i shkathët. Ka qëlluar dhe më pas është larguar pa shkëmbyer asnjë fjalë. Ka dhënë identikitin e tij”.
Hetimet në lidhje me vrasjen
Sipas hetimeve të para mësohet se, Everesti, dhe pse i dyshuar për një të shkuar kriminale, nuk ishte se ishte person që ruhej, apo kishte ndonjë dyshim se mund ti bëhej ndonjë atentat, ndaj ai lëvizte lirshëm në qytet.
Çaka 12 vite më parë ka qenë i arrestuar nga policia e Elbasanit për ekzekutimin e Gëzim Alikajt te Ura e Zaranikës në Elbasan. Gjithashtu ai ka qenë dhe i dyshuar kryesor për një vrasje të trefishtë në Elbasan, ku u vranë vëllezërit Xhelal dhe Pëllumb Mahmuti, si dhe babai i tyre, Emin Mahmuti.
Këta të fundit ishin vëllezërit dhe babai i “Nel Çamit”. Vrasja e dy djemve dhe babait të tyre, është kryer në sy të Myzejen Qoses, bashkëshortes së Pëllumbit, e cila ka parë të gjithë ngjarjen dhe në ikje e sipër autori është përleshur me të, duke e qëlluar me një plumb afër syrit, por fatmirësisht gruaja ka shpëtuar.
Të dhënat e deritanishme tregojnë se autorët e kësaj ngjarje mund të jenë vrasës me pagesë ndaj grupi hetimor po përpiqet që përmes të dhënave të bëjë identifikimin e personave që janë dhe porositësit e kësaj ngjarje. Makina e përdorur në krim u gjend shumë larg vendit të ngjarjes, ndërsa mësohet se ishte vjedhur në Shkodër.
