Gazetarja Anila Hoxha, ka dhënë detaje të reja në lidhje me vdekjen misterioze të 23-vjeçares Evgjeni Baxho, teksa deklaroi se personi i fundit që e ka takuar, është një i ri i cili kishte miqësi me të. Deklarata e Hoxhës u bë mbrëmjen e sotme në emisionin ”Open” në Top Channel.
Hoxha tha se viktima punonte në një kompani telefonike, dhe i riu i cili ishte kolegu i saj i punës, ishte takuar me të në një kafene, dhe e kishte pyetur se përse nuk ishte paraqitur në punë prej 10 ditësh.
Në dëshminë e tij, i riu ka deklaruar se Baxho është çuar nga kafeneja, pas një telefonate, e cila rezultoi të ishte nga tezja e saj.
Anila Hoxha: “Vdekja është shkaktuar nga tromboza, por pritet dhe vendimi i ekspertizës nga telefonat celularë dhe një laptop, nga përmbajtja e të cilëve mund të zbardhet diçka lidhur me mesazhet e mundshme që ka shkëmbyer. Janë marrë dëshmi nga personat e fundit që kanë kontaktuar së fundmi me të. Ajo punonte në një kompani telefonike dhe personi i fundit që besohet se e ka takuar është një i ri nga Tirana që ka treguar miqësinë e rastësishme me të dhe telefonatën për të ditur pse nuk ishte paraqitur në punë prej 10 ditësh.
Ai tha se ishte një vajzë e qetë, dhe e kishte ftuar për kafe, por qëndroi vetëm 10-15 minuta, pasi vajza ishte çuar me shpejtësi nga kafja pas një telefonate që rezultoi të ishte i tezes. Po vëzhgohen edhe komunikimet e saj në Facebook, ndërsa është marrë dëshmia e mjekut për shkak të disa recetave të gjendur në dhomën ku qëndronte me qira. Deri tani, ekspertët e kanë të pamundur të interpretojnë simbolet në trupin e saj”
