Të martën fermerët italianë sfiduan sekretarin amerikan të Shtetit Mike Pompeo lidhur me kërcënimet që vijnë nga Uashingtoni për t’i vendosur tarifa disa prej produkteve ushqimore italiane si kundërpërgjigje ndaj subvencioneve qeveritare për kompaninë ajrore evropiane Airbus.
Teksa Pompeo ndodhej për vizitën 4-ditore në Itali një gazetare që drejton një emision satirik iu afrua atij dhe i zgjati një copë djathë. “Kjo është diçka e bërë me zemër, shpresojmë që ju mund të na ndihmoni duke ia çuar Zotit Trump”, tha ajo.
Zoti Pompeo gjestin në fjalë e priti buzagaz, ndërsa zoti Conte urdhëroi rojet e sigurisë të largojnë gazetaren. “Ajo nuk është më e mirëpritur. Shoqërojeni jashtë ju lutem. Trego respekt kur je i ftuar në shtëpinë e dikujt tjetër”, iu drejtua zoti Conte gazetares.
Kujtojmë se Shtetet e Bashkuara kanë hartuar një listë produktesh importi të BE-së në vlerë 25 miliardë dollarë, nga e cila do të zgjedhë ato që do të preken nga tarifat, duke filluar nga avionët apo pjesë të tyre, tek vera, djathi e produkte luksi.
Disa produkte italiane, përfshirë djathin parmixhan dhe vajin e ullirit, pritet të jenë subjekte të tarifave. Fermerët italianë thonë se ky do të ishte një veprim i padrejtë pasi Italia nuk është pjesë e konsorciumit Airbus. Ata thonë se taksa e propozuar mund të shkatërronte një treg jetësor të eksportit.
