Një gazetare investigative, pasi është përdhunuar, më tej është vrarë. Kjo masakër ka ndodhur në Bullgari, ndërsa hetuesit ende po merren me hedhjen dritë të këtij akti. I referohemi gazetares investigative Viktoria Marinova, e cila është gjetur e vrarë të shtunën, në një park në qytetin verior të Ruse, në Bullgari, pranë lumit Danub.
Kjo vrasje ende mbart mistere, pasi nuk dihet nëse vrasja është e lidhur me punën e 30-vjeçares në një stacion televiziv lokal, TVN. Policia e cila po meret me këtë ngjarje të rëndë, po shqyrton jetën e saj personale dhe profesionale.
Prokurori rajonal tha se Marinova kishte pësuar goditje fatale në kokë, dhe ishte mbytur, duke shtuar se “celularët, çelësat e makinave, syzet dhe një pjesë e rrobave të saj mungonin”. E ndërsa Ministri i Brendshëm Mlladen Marinov më vonë i konfirmoi gazetarëve se viktima ishte përdhunuar gjithashtu.
