Lazio dhe Inter do të luajnë ndeshjen më të rëndësishme të sezonit këtë të diel, pasi diskutohet vendi i katërt që të dërgon në Champions League, por nga ana tjetër edhe do të sillte miliona në arkat e klubeve.
Ndërkohë skuadra bardheklatër ka një avantazh në këtë takim, pasi futet në fushë për dy nga tre rezultatet e mundshme. Në një shkrim të “Rai Sport” kryefjala e takimit do të jetë gardiani i Kombëtares shqiptare, Tomas Strakosha.
“Thomas Strakosha është rritur shumë dhe në garat e fundit e ka treguar në fushë këtë gjë. Në ndeshjet e kampionatit, numri një i Lazio-s e ka shpëtuar skuadrën nga disa humbje, ku së fundmi më e rëndësishmja ishte ndaj Atalantës në ‘Olimpico’. Djaloshi shqiptar është i ri në moshë, por me shumë perspektivë. Të dielën do të jenë shumë tifozë me sytë nga Lazio dhe ai”, ka deklaruar Giuseppe Bisantis.
Megjithatë, Strakosha do të ketë përballë kryegolashënuesin ziklatër në këtë takim, i cili kërkon me ngulm që të udhëheqë milanezët drejt udhës për Champions.
