Pas përgjimeve të publikuara nga gazeta Bild, nga dosja 339, ku faktohej komunikimi i Dakos me Avdylajn për blerje votash, dalin detaje të reja lidhur me këtë dosje.
Gazetari investigativ Flamur Vezaj ka rikthyer në vëmendje ish-kryeprokurorin Adriatik Llalla, të cilin e akuzon se urdhëroi të mos kryhej asnjë veprim hetimor për shkak të njohjeve personale që kishte me kreun e Bashkisë së Durrësit, Vangjush Dakon.
Më tej, Vezaj shkruan se “prokuroria nxjerrjen e sekretit hetimor duhet ta kërkojë tek këta persona: Adriatik Llalla, Besim Hajdarmataj, Anton Martini, Donika Prela Vladimir Mara dhe Dritan Premci”.
Sipas gazetarit, u desh ndërhyrja e autoriteteve gjermane, pas informacioneve që solli Eulex në Kosovë. Në vitin 2016 në prokurorinë e përgjithshme kanë mbërritur qindra CD me përgjime.
“Ato i janë dorëzuar ish-prokurorit Adriatik Llalla që e shkatërroi prokurorinë dhe nga ai tek prokurori Besim Hajdarmataj, shef I prokurorisë së Krimeve të Rënda. Ky i fundit ia delegoi dosjen prokurorit Anton Martini që filloi procedimin penal. Por Martini me kërkesë të tij, iku në Shkodër, dhe ia dorëzoi dosjen sërish Hajdarmatajt.
Ky i fundit, me urdhër nga Adriatik Llalla dhe për shkak të njohjeve personale me kryetarin e bashkisë Vangjush Dako, nuk kryen asnjë veprim hetimor në kohë reale edhe kur diskutohej për vota dhe trafik droge. Hajdarmataj e mbajti në zyrë dosjen deri në momentin që u degdis në Pogradec nga prokurorja e Përgjithshme dhe shoqja e saj Donika Prela.
Kjo e fundit e mbajti dosjen në zyrë deri në momentin që erdhën autoritetet gjermane që kërkuan ndërhyrjen pasi trafikantët kishin ngritur laboratorin e drogës në Has. Aty filloi edhe hetimi nga dy prokurorë që nuk I besojnë njëri tjetrit Vladimir Mara dhe Dritan Premci”, shkruan Vezaj.
