Gaz Demi: Trashi dhe Batha senatorë, Dalipi e di çfarë dua

Që nga momenti që drejtimin e Partizanit e mori Starova u vu re një ndryshim në lojën e “të kuqve”. Por fati i “Bobit” u vendos pasi nuk gjeti përkrahjen dhe harmoninë e duhur me grupin e lojtarëve apo të senatorëve të klubit. Më pas erdhi Dalipi që e ngriti më në perfeksion nivelin e lojës, pasi me të në krye Partizani është rikthyer edhe të fitojë. Në emisionin “Zona Gol” ka folur edhe presidenti Gazment Demi. Ai ka konfirmuar si këshilltarin e tij Moggin dhe foli gjithashtu për të ardhmen e Dalipit.

Çfarë ka ndryshuar te Partizani, që është rikthyer optimizmi?
Që kur jam në krye të Partizanit, gjithmonë ka pasur besim te klubi, por gjithmonë ka malore dhe fushore, ndaj duhen mirëkuptuar këto situata. Më pëlqeu Trashi për mënyrën sesi foli, pasi ai quhet senator te Partizani dhe këtë emër e ka fituar me punën që ka bërë në klubin tonë. Trashi dhe Batha kanë qenë dhe janë senatorë të skuadrës, ndërsa pjesa tjetër që vijnë e ikin, nuk quhen të rëndësishëm në klub.

Keni një vlerësim për italianët e afruar në verë?
Unë kam një zgjedhje italiane, që quhej Luciano Moggi, pasi më pas ishte ai që bëri zgjedhjet e tjera. Moggi më vonë e pranoi se gaboi, pasi nuk e njihte kampionatin, ndërsa më pas është vënë në shërbim të skuadrës për ta ndihmuar. Moggi ka qenë dhe është një këshilltar i imi, por nuk ka qenë asnjëherë Drejtor i Partizanit.

Ka zëra që Partizani po punon për afrimin e një trajneri kroat…
Kjo është një barsoletë. Dalipi ka 5 vite që punon për Partizanin dhe për mua, ndaj ai e di situatën dhe është i qetë. Thashethemet për kontakte me trajner tjetër, janë barsoleta gazetash, sepse ne nuk kemi folur me asnjë tjetër, pasi i besojmë Dalipit, që punon me profesionalizëm dhe dashuri. Ai ka marrë skuadrën pa asnjë objektiv në Superiore, por vetëm një objektiv në fushën e lojës, që presidentit t’i pëlqejë loja.