Ka nisur gara presidenciale në Maqedoninë e Veriut, Blerim Reka ka prezantuar fushatën e tij në Strugë. Kandidati për president në Maqedoninë e Veriut, Blerim Reka u shpreh se në Strugë do të lindë një fenomen politik i cili ka munguar tek shqiptarët.
“Sot nga kjo sallë shoh se Struga do të lindë edhe një fenomen të munguar politik tek shqiptarët, do të lidhë besën për besëlidhjen shqiptare. A ka argument më të fortë se sot po ndodhë besëlidhja shqiptare, e kemi kryetarin e Lëvizjes Besa, Bilall Kasami dhe kemi kryetarin e Aleancës Shqiptare, Ziadin Sela.
Dhe këto dy fjalë kaq të bukura shqipe, besa dhe lidhja krijojnë besëlidhjen për kandidat shqiptar të Republikës së Maqedonisë së Veriut”, deklaroi Reka.
Pjesëmarrja kaq e madhe në këtë fushatë janë treguesi më i mirë se tashmë ka ardhur koha për president shqiptar në Maqedoninë e Veriut, tha kandidati për president Reka.
“E rëndësishme është prania juaj kaq masive, që është demanti më i mirë i atyre që janë disa metra larg neve dhe po mundohen të na bindin se nuk është koha për president shqiptar. Po, po… ka ardhur koha për president shqiptar, bile jemi vonuar shumë. Ne nuk jemi numra dhe statistika, ne nuk jemi 20%, ne jemi kombi më i vjetër në Ballkan”, është shprehur ai.
Po mundohen që këtë fushatë të na e kthejnë kundër, por nuk do të munden sepse kandidatura e Rekës ndihmon shqiptarët në Maqedoninë e Veriut, tha lideri i Aleancës për Shqiptarët, Ziadin Sela. “Dikush mundohet që kësaj fushate të pastër si loti t’i japë nuanca të tjera me përkrahjen e kandidaturës së prof. Blerim Rekës, pa as edhe një qëllim dhe pa as edhe një prapavijë, pra kemi dashakëqijtë që punojnë për t’u dukur ndryshe.
A e dini se kujt i ndihmon kandidatura e Rekës? Shqiptarëve në Maqedoni, fëmijëve, fuqizimit të votës shqiptare por edhe atyre që sot nuk janë në mesin tonë dhe mundohen që të përkrahin një kandidat i cili nuk është i yni, nuk flet shqip, nuk është shqiptar dhe ai do të përballet me përbuzje nga shqiptarët me 21 prill”, u shprehë Sela.
Po ashtu, kreu i Lëvizjes Besa, Bilall Kasami, është shprehur se me votimin e Blerim Rekës, shqiptarët do ta ruajnë nderin e shqiptarisë në Maqedoni. “Struganë, jemi sot këtu që t’ju tregojmë edhe atyre edhe krejt shqiptarëve se shqiptari është me dinjitet, se shqiptari e ka krenarinë e vetë, se shqiptari nuk do ta votojë Stevo Pendarovskin. Shqiptari me 21 prill do të votojë numrin 1, do te votojë Blerim Rekën sepse shqiptari do të ruajë nderin e shqiptarisë në Maqedoni”, deklaroi Kasami.
