Zgjedhjet në FSHF kanë marrë përmasa të mëdha këtë herë, pasi përballë Dukës që kërkon mandatin e 5 radhazi ka dalë një politikan i rëndësishëm si Bashkim Fino. Por më në fund kësaj gare i është shtuar edhe një person tjetër dhe e veçanta është që del nga fusha e sportit. Ai është, Shpëtim Hala, një ish-arbitër në Itali edhe pse në kategoritë inferiore, ku karriera e tij u ndërpre për arsye racizmi. Por drama vazhdon në Shqipëri, ku nuk u pranua nga FSHF të jetë pjesë e arbitrimit.
Edhe pse ka përballë një dyshe të fortë si Duka-Fino, kandidati i ri, Shpëtim Hala është për tu marrë shembull nga njerëzit e sportit në Shqipëri që të marrin guximin dhe të kandidojnë. Duhet të vijë një frymë e re në sportin në Shqipëri dhe pse jo këtë herë të jetë ky kandidat që vjen nga fusha e sportit që të marrë drejtimin e FHF-së. Në një intervistë për “TiranaToday”, kandidati Hala ka shpalosur një pjesë të platformës:
1. Kush ju propozoi si kandidat dhe cilat janë motivet që të shtynë te futesh në këtë garë?
Kandidaturën time e ka propozuar ekipi i Delvinës. Kam pas kontakte të shumta por pranova këtë propozim sepse unë kandidoj për President të FSHF dhe jo të një qarku. Është një iniciativë personale pasi mendoj që mund të jap diçka më shumë për futbollin.
2.Jeni një ish-arbitër në Itali, ndërsa në Shqipëri nuk jeni vlerësuar, cilat janë rezervat ndaj FSHF-së?
Në Itali kam qenë arbitër në kategoritë inferiore, ndërsa në Shqipëri nuk u pranova për të qenë pjesë e arbitrimit. Nuk gjykoj askënd dhe pse nuk më erdhi mirë.
3.Kush janë risitë që do të sillni në futbollin shqiptare?
Besoj që do ta kthej futbollin edhe më të prekshëm se sa është. Krijimi i kampionateve në rang Bashkie dhe qarku. Thithja e investimeve në terrenet sportive e tjera.
4.Keni një platformë të mirëfilltë? Cilat janë pikat kyçe?
Natyrisht që kam një platformë, në të kundërt nuk do të isha bërë pjesë e garës. Disa nga pikat kryesore jua përmenda edhe më lart.
5.Fino vjen nga politika, Duka biznesmen, pse nuk kandidojnë njerëzit e sportit?
Nuk e di sepse nuk kandidojnë, dhe ky është një problem jo i vogël. Duhet të ketë një reflektim më të madh nga njerëzit e sportit.
6.“Shoqatat fantazmë”, si qëndron e vërteta sipas jush?
Shoqatat kanë vite që kryejnë aktivitet. Nuk e shoh të udhës që ky problem të përdoret në prag të zgjedhjeve. Duhet zgjidhur duke zbatuar statutin.
7.Gara për FSHF ka marrë përmasa të mëdha, përballë Dukës dhe Finos sa shanse mendoni se keni?
Unë jam futur në garë për të fituar. Në rast se do të kisha frikë nuk do të kandidoja. Zgjedhjet mund të zhvillohen kudo, pak rëndësi ka vendi mjafton të respektohen rregullat e lojës për një garë të ndershme. TIRANA TODAY
