Danimarka ka marrë një fitore të artë përballë Perusë dhe i është bashkuar Francës me tre pikë në kryesimin e grupit C. Ishte një ndeshje mjaft e bukur, ku të dyja skuadrat kërkonin të merrnin maksimumin. Fitore me fat për danezët, të cilët duhej të kishin kaluar në disavantazh në fundin e pjesës së parë, por Cueva ka gabuar keqas penalltinë e akorduar nga sistemi “VAR”.
Goli që zhbllokoi takimin erdhi në minutën e 59’ nga Poulsen, pas një kundërsulmi perfekt të organizuar nga Eriksen dhe i vetëm përballë portierit nuk gaboi.
Amerikanojugorët hidhen në sulm me të gjitha forcat dhe krijojnë panik në mbrojtjen daneze, por portieri Schmeichel ishte i pakalueshëm duke realizuar pritje fantastike me dorë dhe me këmbë.
Ky rezultat e lë në vendin e fundit Perunë, që në ndeshjen e ardhshme do të luajë kundër Francës, ndërsa danezët do të përballen me Australinë.
