Ministri gjerman për Europën, Michael Roth u shpreh se Shqipëria dhe Maqedonia e Veriut i kanë përmbushur kushtet e përcaktuara nga Brukseli.
Në opinion e tij për “Welt.de”, Roth dakordësohet me qëndrimin e Junker, teksa e konsideroi vendimin e BE-së për këto dy vende ballkanike një “gabim historik”. Sipas tij, nëse BE i “kthen shpinën” rajonit, i lë hapësirë për influencë Rusisë, Kinës dhe Turqisë.
“Bërja e gjithçkaje në Ballkanin Perëndimor për paqen, pajtimin dhe demokracinë duhet të jetë qëllimi ynë kryesor. Sepse rajoni nuk është oborri i pasmë i shtëpisë evropiane. Ai është kopshti në zemër të shtëpisë! Stabilizimi dhe lidhja e rajonit është në interesin e menjëhershëm evropian dhe gjerman”, shkruan Roth.
Ndërsa shtoi se popullsia dhe qeveritë e Shqipërisë dhe Maqedonisë së Veriut kanë provuar me kohë dhe përsëri se janë të gatshëm të bëjnë “kompromise të dhimbshme” për afrimin me BE.
“Në pranverën e vitit 2020, tema duhet të vijë përsëri në axhendën e krerëve të shteteve dhe qeverive të BE-së. Atëherë patjetër duhet ta sqarojmë se i përmbahemi perspektivës së pranimit. Vonesat e mëtejshme do të ishin të papërgjegjshme.
Ndërkohë, Maqedonia Veriore dhe Shqipëria duhet të vazhdojnë përpjekjet e tyre për reforma. Ky është sinjali më i mirë për të gjithë skeptikët. Në të njëjtën kohë, ne duhet të bëjmë detyrat tona të shtëpisë me BE-në dhe të sqarojmë se si t’i tejkalojmë rezervat e shteteve anëtare të veçanta”, shkruan ministri ndër të tjera.
