350 nxënës të shkollës në fshatin Fushë Mamurras rrezikohen nga gërmadhat e ndërtesës së vjetër, shumë pranë objektit.
Një shqetësim i kahershëm i banorëve, i personelit të mësimdhënies dhe më së shumti i fëmijëve që gjenden nën rrezik, ndërsa godina e vjetër e shkollës, i qëndron “krenare” kohës.
Një shëmti e vërtetë e institucioneve, që heshtin para një fakti të tillë rrëqethës. Me një mjet dhe brenda një dite gërmadhat më shumë se 70-vjeçare do të rrafshoheshin, por askush nuk ka ndërhyrë për këtë rrezik që shfaqet çdo ditë.
Disa pjesë të ish-shkollës së vjetër kanë rënë, fatmirësisht nuk është regjistruar ndonjë incident, ndonëse fëmijët ndodheshin pranë dhe nuk dihet përse nuk ndërhyhet të shembet kjo ndërtesë e rrezikshme.
Kjo përbën rrezik dhe për një pjesë të rriturish në orët e mbrëmjes, të cilët mblidhen dhe ulen në tryeza duke rrethohen ndonjë dhe jo tek rreziku që i kanoset mbi kokat e tyre.
Në ditën e parë të shkollës, një pjesë e personelit të mësimdhënies tentuan të bojkotonin mësimin, por më kot, nga frika e ndonjë penalizimi.
“Më mirë të pranojmë këtë realitet, se të largohemi nga puna”, kështu kanë pohuar një pjesë e tyre.
Nuk dihet sa kohë duhet pritur për një vendim për rrëzimin e gërmadhave të kësaj godine të rrezikshme dhe fëmijët të kapërcejnë makthin e frikës, apo duhet të ndodhë një tragjedi që institucionet përkatëse të marrin masa./ Tirana Today
