Kryeprokurorja Arta Marku po bën bujë me lëvizjet e shumta brenda Prokurorisë, ndërsa së fundmi ka realizuar edhe takimin e parë me gazetarët pas marrjes së detyrës.
Gjatë këtij takimi, ajo ka bërë deklarata të forta, teksa ka thënë se shumë shpejt do të shohim “surpriza” të tjera, duke paralajmëruar lëvizje të tjera, por mbase edhe kapjen e të ashtuquajturve “peshq të mëdhenj”.
“Do të ketë shumë ndryshime dhe do shihni surpriza. Nuk do jenë vetëm ato lëvizje që janë bërë deri tani. Nëse do jem neutrale dhe e pavarur politikisht këto do t’i tregojë puna ime dhe rezultatet”, sqaroi kryeprokurorja e përkohshme Arta Marku.
Po ashtu, ajo tha se nuk do të refuzonte një mandat 7-vjeçar si Prokurore e Përgjithshme nëse zgjidhet me mandat të plotë.
“Nuk do thoja jo”, u përgjigj ajo shkurtimisht.
Ndër të tjera, Marku u shpreh se prioritet i saj do jetë zbatimi i ligjit, ndërsa ka paralajmëruar surpriza në organin e akuzës.
“Prioriteti im është të zbatoj ligjin”, tha ajo. Sa i takon furtunës në Prokurorinë qendrore dhe të rretheve, Marku tha se ata e dinë arsyen e largimit, ndërsa sqaroi se nuk është personalisht ajo shkaku i tensionit të shkaktuar me të larguarit, shkruan Shqiptarja.com.
“Tensioni më të larguarit s’është krijuar prej meje por prej ligjit. Ata që janë larguar e dinë arsyen dhe po ashtu dhe ata që kanë ardhur në detyrat e reja e dinë arsyen”.
