Nisma “Fundjavë Ndryshe” ka vijuar aktivitetin e saj edhe përgjatë ditëve të nxehta që ka sjellë stina e verës.
“Fundjavë Ndryshe” ka vizituar familje të shumta në qytete dhe fshatrat e vendit duke ofruar gjithë asistencën e saj për shumë individë që përveç kushteve të vështira të jetesës do të duhen të përballen edhe me temperaturat e larta të këtyre ditëve.
Së fundmi, “Fundjavë Ndryshe” ishte në Shkodër, konkretisht në njësinë administrative të Postribës, për të ndihmuar disa familje në nevojë. Midis tyre edhe një të moshuar.
Kësaj nisme iu bashkua edhe modelja shqiptare me famë botërore, Emina Çunmulaj, e cila u trondit kur pa nga afër kushtet e mjerueshme në të cilën jetonin pjesëtarët e këtyre familjeve.
“Unë kam pa varfëri nëpër botë, kam kenë në ndihmat humanitare në Indi dhe Afrikë, por kur një nanë shqiptare dridhet e të kërkon ndihmë, ajo të ther në zemër”, u shpreh ajo në një intervistë për “Tirana Today”.
