Prej vitesh familjes Harizi në Kamëz çdo vit i duhej të përballej me përmbytjet çdo herë që binte shi. Mes varfërisë ekstreme, familja jetonte në kushte të tmerrshme. Fondacioni “Fundjavë Ndryshe” dhe emisioni “Stop” bënë të mundur që në një kohë shumë të shkurtër, familja Harizi të bëhej me një shtëpi të re.
“Një shtëpi nuk e kisha menduar në ëndërr dhe kjo shtëpi u bë realitet,”-shprehet Bukuria.
Si pasojë e lagështirës së madhe që ishte krijuar në ambientet e shtëpisë, shumë herë ishte rrezikuar edhe shëndeti familjarëve. Djali i familjes Klajdi ka qenë i shtruar për 3 muaj në sanatorium, me ftohje të rëndë në mushkri, për shkak të lagështisë.
“Librat na lagen përherë, unë kam qenë i shtruar në spital për shumë kohë pasi shtëpia ka shumë lagështi. Çdo gjë që ne kemi apo na e falin, ne na myket. Nuk kemi ç’të bëjmë,”- ishte ky rrëfimi prekës i Klajdit.
Për familjen Harizi tashmë fillon një jetë e re, ku librat e fëmijëve nuk do të lagen më sa herë të bjerë shi.
Veç bizneseve të cilat kontribuan për ndërtimin nga e para të shtëpisë, një ndihmesë shumë të veçantë dhanë edhe banorët e rrugës “Mujo Ulqinaku” në Kamëz. Për t’i siguruar familjes Harizi një jetesë më të mirë dhe ky dimër t’i gjej në një shtëpi më të ngrohtë.
