Duke filluar që nga mesnata e së premtes, i gjithë vendi është mbuluar me vranësira të dendura. E shtuna do të sjellë reshje shiu gjatë ditës, në të gjithë territorin, ndërsa reshje dëbore do të ketë deri në 600 m mbi nivelin e detit. Siç mësohet nga Meteoalb, e diela mbetet me vranësira, por me reshje më të pakta shiu e dëbore, kryesisht në jug dhe zonat lindore. Temperaturat do të ulen me 2 – 3°C mesditën e së shtunës, ndërsa e diela sjell një tjetër rënie me 2°C në të dy ekstremumet termike të ditës, duke luhatur vlerat e tyre nga –3°C në 12 – 13°C.
Ndërkohë, nga llogaritjet hidrologjike të IGJEUM, rezulton se edhe nesër lumenjtë Drin, Buna dhe Liqeni i Shkodrës do të vazhdojnë të kenë prurje dhe nivele të larta, të cilat do të varen nga shkarkimet e Kaskadës mbi Lumin Drin. Lumenjtë e tjerë në të gjithë territorin nuk paraqesin rrezik.
