“Arous në Detin e Kuq, një botë e mrekullueshme që duhet ta shikoni të paktën një herë në jetë”, kështu shkruhet në broshurat e shpërndara në gjithë botën për fshatin turistik misterioz. Arous konsiderohej një vendpushim magjepsës idilik në shkretëtirën sudaneze, në brigjet e Detit të Kuq, por në të vërtetë destinacioni turistik ishte një bazë sekrete e agjentëve izraelitë, të cilët ndodheshin në një mision historik.
Arous përshkruhej si një parajsë nën dritën e yjeve, me shkëmbinj koralorë dhe një sërë anijesh të çuditshme, të mbytura prek shekujsh në shtratin e detit.
Hebrenjtë etiopianë i përkisnin një komuniteti të quajtur Beta Izrael (Shtëpia e Izraelit), origjina e të cilit është edhe sot e kësaj dite e mbuluar me mister.
Disa besojnë se ata ishin një nga 10 fiset e lashta të Izraelit, ndërsa të tjerë mendojnë se ata u strehuan në Izrael pas shkatërrimit të tempullit të parë hebre.
Misioni i shpëtimit: “Ne iu drejtuam marinës izraelite për ndihmë, thotë një agjent i nivelit të lartë i përfshirë në mision, i cili nuk donte të identifikohej. Ata pranuan dhe disa nga djemtë e Mossadit u dërguan në Sudan duke kërkuar për plazhe të përshtatshme”.
Por fati i çoi në një fshat të braktisur në bregdet, në mes të asgjësë. E vetmja gjë që gjetën ishte një resort i përfunduar në vitin 1972 nga sipërmarrësit italianë, me 15 shtëpiza me tarraca të kuqe, një kuzhinë dhe një dhomë të madhe ngrënieje. Megjithatë, duke qenë se nuk kishte energji elektrike, furnizim me ujë apo rrugë, projekti turistik nuk u hap kurrë.
