Trafikimi i lëndëve narkotike nga Shqipëria vijon të mbetet në qendër të vëmendjes nga mediet e huaja. Së fundmi, është gazeta gjermane “Berliner Kurier”, e cila i ka kushtuar një artikull bandave shqiptare që furnizojnë me marijuanë dhe kokainë Evropën dhe Amerikën e Jugut, raporton Tirana Today.
Jo vetëm kaq, por artikulli përmend edhe Klement Balilin, të shpallur në kërkim, teksa shkruan se është përgjegjës për shndërrimin e Shqipërisë në një korridor për drogërat e forta, si dhe citon se po nxit luftën mes bandave për trafikimin e drogës.
Më poshtë artikulli i plotë, publikuar nga Berliner Kurier:
Berlin – Ai është një ndër kriminelët më të fuqishëm në Evropë, që kontrollon pjesën më të madhe të tregut evropian të kokainës dhe, në vendin e tij, në Shqipëri, ka punuar edhe në ministri. Quhet Klement Balili, i njohur ndryshe edhe si “Eskobari i Ballkanit”, duke iu referuar lordit të njohur të drogës në Amerikën e Jugut. Gjurmët e gjakut të Balilit janë gjetur edhe në Berlin.
Në maj të vitit 2017, nga një pub në “Rrugën Groninger”, në Wedding të Berlinit, pati disa të shtëna me armë automatike. Pavarësisht se u gjuajtën 26 plumba, fatmirësisht nuk u plagos askush. Çuditërisht, ndër shumë agresorët e tjerë, ishte edhe pronari shqiptar 34-vjeçar, me origjinë nga Kosova.
“Korridori i drogave të forta”
Sipas prokurorisë, të shtënat, të cilat gjykata po mundohet t’i provojë si një tentativë vrasjeje të lidhur me trafikun e drogës, kishin të bënin me një shumë të konsiderueshme parash Cash dhe me një dërgesë të papaguar. Hetuesit frikësohen se ky ishte fillimi i një serie përplasjesh të përgjakshme në një luftë të re për drogën. Sipas të dhënave nga autoritetet investigative të Europolit, mafia shqiptare, nën udhëheqjen e baronit të drogës Klement Balili, është e vendosur ta rrisë edhe më tej “epërsinë e saj në tregun europian të drogës.”
Për vite me radhë, Shqipëria, me mesatarisht 218 ditë në vit diell dhe me autoritete të korruptuara, ka qenë prodhuesi numër një i marijuanës në Europë. Sipas Europolit, Shqipëria është shndërruar tashmë edhe në një “korridor për drogat e forta”, sidomos për kokainën. Përgjegjës për këtë mund të thuhet se është Klement Balili, i cili, sipas të dhënave të Agjencisë Amerikane të Drogës, DEA, duket se ka kontakte të drejtpërdrejta me bosët e drogës në Amerikën e Jugut.
Gjashtë vrasësit heshtin
E pabesueshme! Në vitin 2014, megjithëse Balili ishte në fokus të Europolit dhe DEA-s, ai u emërua zyrtarisht nga qeveria shqiptare si drejtor i Transportit Rrugor në Ministrisë e Transportit, për t’u larguar nga ky pozicion pune vetëm pasi ndërkombëtarët ashpërsuan tonet kundër emërimit të tij. Aktualisht, droga e Klement Balilit po përmbyt Europën dhe Berlinin.
Mbetet ende e paqartë se deri në ç’masë është përfshirë Balili apo personat e tij në vrasjen e ndodhur në Weddinger në Berlin. Kjo pasi gjer më tani, asnjëri nga gjashtë atentatorët (27-40-vjeçarë) nuk kanë thënë asgjë përpara gjykatës. Deri në qershor janë parashikuar të zhvillohen edhe 20 procese të tjera gjyqësore.
Përktheu: Hysni Ndreu
