Pesë shqiptarë kanë përfunduar në pranga në Francë, pasi akuzohen për trafikim droge. Goditja e grupit trafikant është krye më 3 shtator, por lajmi është bërë i ditur këtë të hënë.
Aksioni i policisë franceze të Annecy u finalizua pas disa muajsh hetime. Mediat franceze shkruajnë se të arrestuarit janë të moshës 30 dhe 40, ndërsa gjeneralitetet e tyre nuk bëhen të ditura.
Kreu i seksionit të antitrafikut në policinë e Annecy, Jean-Philippe Charvet, tha se të arrestuarit ishin pjesë e një grupi që ka trafikuar sasi të mëdha droge në Francë dhe Zvicër. Policia franceze ka konfiskuar gjithsej 230 kg përzierës, tre automjete dhe 4.000 euro.
Droga u gjet në dy ndërtesa që grupi i përdorte si baza, në zonat e Gaillard dhe Annemass. Këto 230 kilogramë, të prera me heroinë, nëse shiteshin me doza të vogla, kapnin vlerën e rreth 6.5 mln euro.
