Policia e Shtetit dhe Ministria e Brendshme kanë riatdhesuar 30 shtetas që kishin aplikuar për azil në Francë.
Drejtori i Policisë së Shtetit, Haki Çako dhe zëvendësministri i Brendshëm, Stefan Çipa në një prononcim për mediat theksuan se shanset për azil në vendet evropiane janë pothuajse zero. Sipas tyre shtetasit shqiptarë mund të aplikojnë për punë në vendet e BE-së vetëm përmes procedurave ligjore.
Zëvendësministri i Brendshëm, Stefan Çipa, ka qartësuar se ‘‘vetë ky grup, por dhe grupe të tjera, duhet t’i japin fund një aventure shumë të kushtueshme për ta dhe për familjet e tyre. Dhe vetë kjo tregon thirrjen e herëpashershme që autoritetet shqiptare u kanë bërë shtetasve të vet, që të heqin dorë nga kjo tentativë e cila kuptohet është e destinuar të dështojë’’.
Ndërsa drejtori i Policisë Haki Çako vuri në dukje se azilkërkuesit duhet ta kenë të qartë se nuk mund të përfitojnë statusit e azilantit.
‘‘Në këtë kuadër mund të them se ne vazhdojmë në mënyrë intensive në bashkëpunim me të gjithë partnerët, por edhe me të gjithë shtetet e tjera të Bashkimit Evropian të cilët kanë bërë më së të qartë se azilkërkimi në vendet e Bashkimit Evropian është i pamundur dhe ndaj në këtë kuadër të gjithë shtetasit shqiptar të cilët marrin iniciativën ose cenojnë dhe nuk respektojnë rregullat e Shengen janë të detyruar të kthehen dhe të riatdhesohen në Shqipëri, duke krijuar një kosto të jashtëzakonshme jo vetëm për familjet dhe për vetë ata në aspektin financiar, por edhe një kosto të madhe lidhur me të gjithë qytetarët dhe shtetasit shqiptar të cilët mezi presin integrimin dhe futjen e Shqipërisë në Bashkimin Evropian’’, u shpreh Çako.
Ai shtoi se ‘‘u bëj një apel të gjithëve, që të orientohen dhe t’i drejtohen respektimit të gjitha normave konform punësimit të ligjshëm me të gjitha procedurat që orientohen nëpërmjet MPJ-së ose të gjitha Agjencive të tjera, pasi shumë vende të BE-së ofrojnë realisht mundësi punësimi, por nuk është kjo rruga dhe mënyra për t’u drejtuar’’, përfundoi Çako.
