Gjatë mbledhjes së sotme, Qeveria miratoi emërimin e dy zv.ministrave të rinj të Arsimit. Bëhet fjalë për Redi Shtinon dhe Lorena Haxhiun, duke shkuar kështu në katër numri i zëvendësministrave në këtë dikaster, bashkë me Shpati Kolgegën dhe Kostandin Shkurtin.
Ata zënë vendin e Besa Shahinit, e cila nga zv.ministre mori postin e Lindita Nikollës, pas shkarkimit nga kryeministri Rama në dhjetor të 2018-ës, si dhe vendin e Taulant Mukës, i cili dha dorëheqjen dy javë pas emërimit.
Dy zyrtarët e rinj nuk janë emra të panjohur për publikun shqiptar e më gjerë.
Redi Shtino ka mbajtur edhe më herët këtë post. Ai ka qenë zv.ministër në 2016-ën, kohë kur ministrinë e drejtonte Lindita Nikolla, por nuk dihen arsyet pse u tërhoq nga ky pozicion.
Lorena Haxhiu është një emër i njohur, pasi ka drejtuar një emision televiziv në ‘Vizion Plus’, si dhe ka drejtuar organizata jofitimprurëse. Po ashtu ajo ka mbajtur postin e drejtoreshës për rininë në Ministrinë e Arsimit.
Vendimet nuk janë publikuar ende nga Kryeministria, ndërkohë që pas 15 ditësh ato botohen dhe hyjnë në fuqi në fletoren zyrtare.
