Mjaft restorante, të cilat pretendonin se shërbimi dhe cilësia justifikonin çmimin, tashmë janë mbyllur. Në mjaft raste, ushqimet e pakontrolluara, ato të skaduara, gatuheshin dhe i servireshin si të freskëta qytetarëve, të cilët e frekuentonin atë ambjent. Sot janë marrë masat ndaj dy restoranteve, në Vlorë dhe Ksamil.
“Konkretisht, gjatë aksionit që AKU po ushtron në zonat bregdetare, trupa inspektuese DRAKU, Vlorë, ka bllokuar 2 subjekte, me aktivitet “Restorant” dhe “Bar-Piceri”, ku kryenin veprimtari në kundërshtim me standardet e sigurisë ushqimore, si dhe në kushte të rënda higjeno-sanitare.
Ndërsa një tjetër subjekt me aktivitet “Restorant” është goditur nga AKU, për shkak se tregtonte produktin “Dater” ose ndryshe “gurëshpuesi”, tregtim i cili nuk lejohet sipas legjislacionit në fuqi.
Ndaj dy subjekteve Bar-Piceri “Kasamili” dhe Bar-Resorant “Donika Haxhiraj” në Jonufër, Vlorë, janë marrë masë administrative gjobë (për kushte të rënda higjeno-sanitare) si dhe bllokim të menjëhershëm të aktivitetit.
Ndërsa ndaj subjektit, restorant “Lori” në Ksamil, u mor masë administrative gjobë 100.000 lekë, si dhe asgjësim i 1 kg “dater” duke e bërë të papërdorshëm për konsum”.
