Presidenti Donald Trump do të takohet me liderët e NATO-s për bisedimet potencialisht të rrëmujshme në një samit në Bruksel së shpejti.
Përpara vizitës së tij, Trump ‘goditi’ BE-në në tregti dhe aleatët e tij të NATO-s për mos shpenzimin e mjaftueshëm të mbrojtjes.
Ai u prit me një qortim të ashpër nga Presidenti i Këshillit Europian Donald Tusk, i cili akuzoi presidentin për kritikimin e Europës “pothuajse çdo ditë”.
“E dashur Amerikë, vlerësoji aleatët tuaj, pasi të gjithë ju nuk keni aq shumë.”
Z. Tusk shtoi se BE shpenzon më shumë se Rusia për mbrojtjen, dhe po aq sa Kina.
Ai tha se SHBA nuk kishin dhe nuk do të kishin një aleat më të mirë se BE, duke kujtuar presidentin se trupat evropiane kishin luftuar dhe kishin vdekur edhe në Afganistan pas sulmeve të 11 Shtatorit 2001 në SHBA.
Nga ana e tij, Presidenti Trump parashikoi se takimi i NATO-s mund të jetë më i vështirë sesa samiti i tij me udhëheqësin rus Vladimir Putin, në Finlandë të hënën e ardhshme.
Por, Presidentin e Shteteve të Bashkuara të Amerikës, Donald Trump nuk e priti askush në Belgjikë. Ai u pa të zbriste me Melanien nga avioni, ndërkohë që në aeroport nuk e priti askush.
Tgcom24 raporton se gjatë mbërritjes së tij në bazën ajrore të Melsbroek, kreu i Shtëpisë së Bardhë nuk u prit nga krerët e institucioneve belge. Motivi? Gjysmëfinalja e kampionatit botëror të futbollit Francë-Belgjikë.
Sipas medias italiane, mbreti Philip ishte së bashku me Mbretëreshën Matilde në Shën Petersburg për të ndjekur sfidën, e humbur 1-0 nga “Djajtë e Kuq”, ndërsa Kryeministri Charles Michel pa ndeshjen në një “fan zone” në qytetin Braine-le -Comte.
Për të pritur Trump, qeveria belge kishte dërguar një zyrtar të Ministrisë së Jashtme, Françoise Gustin, pasi edhe titullari i ministrisë kishte shkuar në Rusi.
