Dy efektivë të forcave speciale të policisë ndodhen para hyrjes së shtëpisë ku jeton Xhisiela Maloku. Ndërsa një efektiv brenda një furgon policie, shihet pranë banesës. Masat që ka marrë policia vijnë pas shpërthimit që ndodhi pranë banesës në fshatin Larushk të Fushë-Krujës. Ngjarja ndodhi rreth orës 23:30 të së dielës.
Lënde plasëse shpërtheu në cepin e oborrit që lidh banesat e dy shtetasve, Ramazan Muça dhe Besim Muça. Tritoli është vënë në oborrin e shtëpisë së gjyshit të Xhisiela Malokut. Nga shpërthimi fatmirësisht nuk pati të lënduar.
Ramazan Muça, është gjyshi nga nëna i 25-vjeçares Xhisiela Maloku. Shpërthimi vjen pak ditë pas skandalit, ku Xhisiela Maloku u dhunua nga djali i deputetit të PS-së, Rrahman Rraja që ka mohuar akuzat. Gjithashtu dhe vetë vajza mohoi se është dhunuar por se e kishte denoncuar ish-të dashurin Rexhep Rraja për xhelozi pavarësisht ekspertizës së mjekëve dhe psikologut. Aktualisht Rexhep Rraja ndodhet në burg.
“Më datë 07.10.2018, rreth orës 23:30, në fshatin Larushk Fushë-Krujë, në cepin e oborrit që lidh banesat e shtetasve B.M dhe R.M është hedhur nga rruga dhe ka shpërthyer një sasi e vogël lënde plasëse. Nga shpërthimi nuk ka të lënduar dhe as dëme materiale. Policia ka shkuar menjëherë në vendin e ngjarjes. Janë shoqëruar në Polici 9 persona. Grupi hetimor vijon veprimet në bashkëpunim me Prokurorinë për zbardhjen e rrethanave të ngjarjes , identifikimin dhe kapjen e autorëve”, thuhej në njoftimin e policisë.
