Një sherr masiv ka ndodhur në ligën e katërt zvicerane ndërmjet ekipeve FC Kosova GE 2 dhe FC Versoix 2. Ndeshja ishte e tensionuar dhe në fund futbollistët filluan të godisnin kundërshtarët, po ashtu në fushë zbritën edhe zyrtarët e klubeve dhe u përfshinë në këtë përleshje.
Raportohet se pati persona të lënduar si nga klubi shqiptar edhe nga ai zviceran, të cilët janë dërguar në spital. Federata Zvicerane pritet t’i dënojë ashpër futbollistët dhe klubet respektive, por futbollistët mund ta pësojnë edhe largimin nga shteti zviceran.
Dy futbollistë të Versoix kishin pësuar lëndime të rënda, njëri prej të cilëve pësoi një thyerje të brinjës dhe dëmtim të mushkërive. Katër lojtarë të FC Kosova janë shoqëruar në polici. Tre prej tyre tashmë janë liruar, por gjykimi ndaj tyre do të vazhdojë, shkruan “Tribune de Genève”.
Ndërsa njëri vazhdon të jetë pas hekurave në burgun Champ-Dollon. Gjashtë lojtarë janë të përfshirë në hetime dhe kanë të bëjnë me veprën penale “dhunë fizike, grindje dhe shkelje të Ligjit për të huajt”, ka deklaruar Prokuroria publike. Edhe Federata ka marrë masa të rrepta, pasi ka përjashtuar pa afat katër futbollistët e ekipit Kosova, e cila është e barabartë me një pezullim të përjetshëm, i cili nuk ekziston në rregulloret e Zvicrës.
Një lojtar i FC Versoix është pezulluar për një vit, deri më 10 qershor 2019. Edhe klubi i komunitetit shqiptar ka marrë një ndëshkim të rëndë, pasi është përjashtuar nga kampionati për dy sezonet e ardhshme.
Ish presidenti i KF Kosova, i cili ka dhënë dorëheqjen kohët e fundit pikërisht për këto arsye tashmë ka vendosur që të shpërbëjë ekipin. Klubi gjithashtu gjobitet me 2.000 franga “për sjellje të gabuar të shumicës së lojtarëve dhe hyrjen në fushë të spektatorëve të cilët u përfshinë në sherrin masiv”.
