Aksionet e Policisë Bashkiake tashmë i hasim çdo ditë në rrugët e Tiranës. Një aksion që prej kohësh u merr qytetarëve bukën e gojës.
Në pamundësi për të gjetur një vend pune më të përshtatshëm dhe me të ardhura më të larta, shumë qytetarë, kryesisht në moshë madhore, zgjedhin të shesin diku në një cep të rrugës.
Por, shitësit ambulantë po shihen si problemi më i madh i shoqërisë nga Policia Bashkiake. Edhe pse të gjithë jemi të vetëdijshëm për të ardhurat e pakta që sigurojnë, punonjës të Policisë Bashkiake vijojnë të sekuestrojnë mallin e tyre, për shkak të zaptimit të rrugës.
Jo vetëm kaq, por ata sigurohen edhe që të gjobisin shitësit në fjalë në mënyrë që të sigurohen se nuk do i shohin më në rrugë këta “kriminelë”.
Rasti më i fundit vjen në redaksinë Tirana Today nga kryqëzimi i Ushtarit të Panjohur, të cilit i kanë sekuestruar 15 paketa, ndërsa nuk kanë ngurruar t’i japin as gjobën si ndëshkim për shkeljen e tij në tentativë për të fituar bukën e gojës.
