Haki Çako e ka pritur shkarkimin nga detyra me qetësi. Të paktën kështu duket nga fotoja e mësipërme, ku ish-kreu i Policisë së Shtetit ka buzëqeshur, madje ka përshëndetur mediet, teksa ka mbërritur në drejtorinë e përgjithshme të policisë.
Siç mund të merret me mend, Haki Çako ka qenë i njohur me këtë vendim të ministrit të Brendshëm, Fatmir Xhafaj, gjë që e konfirmoi edhe për mediet.
Megjithatë, Çako ka preferuar të mos japë detaje nga takimi me ministrin Xhafaj. Po ashtu, në medie është përfolur se Çako mund të emërohet në një tjetër post nga ministri i Brendshëm, pas largimit nga kreu i Policisë së Shtetit.
Arsyeja e shkarkimit të Çakos, sipas Xhafajt, është nevoja për një lidership të ri dhe me energji të reja.
“Objektivat tona kërkojnë dinamikë të madhe pune. Duhet një lidership i ri në Polici, me energji të reja. Puna e policisë, e orientuar drejt rezultateve konkrete”, shkruhej në njoftimin e ministrisë së Brendshme. TIRANA TODAY
