Personi që shikoni në foto është 24-vjeçari Ridvan Zykaj, i cilia pasditen e sotme sipas policisë ka vrarë 8 persona nga fisi i tij. I riu, për motive ende të paqarta ka vrarë me armë zjarri 8 persona nga dy familje. Sipas policisë, 24-vjeçari Ridvan Zykaj, ka qëlluar për vdekje 8 persona nga dy familje po nga fisi i tij, në fshatin Resulaj të Vlorës.
Viktimat raportohet se janë të afërm me njëri-tjetrin, ndërsa edhe autori ka lidhje me ta. Autori pas krimit është larguar nga vendi i ngjarjes dhe në ndjekje të tij janë vënë forca të shumta të Policisë, Renea, Delta Forcë, FNSH, dhe forcat e Drejtorisë Vendore të Policisë Vlorë. Grupi hetimor nën drejtimin e Prokurorit ndodhet në vendngjarje dhe po punon për zbardhjen e plotë të rrethanave të ngjarjes.
Forcat e Ndërhyrjes së Shpejtë që ndodhen po në këtë qark kanë dalë në aksion për kapjen e tij, pasi konsiderohet tejet i rrezikshëm dhe i armatosur.
Ndërkohë që edhe forca të tjera shtesë nga Tirana janë nisur drejt Vlorës. Reparti RENEA është vënë menjëherë në lëvizje. Të gjitha fshatrat rreth e rrotull Resulajt, i Njësisë Administrative Vllahinë, janë rrethuar nga uniformat blu për gjetjen në kohë të shpejtë të Ridvan Zykajt.
Në vendin e ngjarjes ka mbërritur grupi hetimor, i cili konfirmoi edhe zyrtarisht për Policinë e Shtetit se, nga këqyrja e vendit të ngjarjes numërohen 8 viktima, të afërm me njëri-tjetrin.
Policia ende nuk ka një motiv të qartë të ngjarjes, se përse është shkaktuar. Në asnjë ngjarje tjetër të rëndë kriminale në Shqipërinë e pas viteve ’90, një autor i vetëm nuk ka shkaktuar këtë numër të lartë viktimash.
