Një veteriner i ka shpëtuar jetën një leopardi, i cili ishte bllokuar në një pus 30 metra. Ngjarja ka ndodhur në Indi, ndërsa operacioni i shpëtimit ka zgjatur dy orë.
Leopardi femër ishte bllokuar në pus për orë të tëra, kur njerëzit pranë qytetit të Guwahatit, në veri-lindje të Assam, e zbuluan atë. Mendohet se leopardi ka arritur në zonën e populluar teksa kërkonte për ushqim, raporton The Telegraph.
Zyrtarët e pylltarisë u ndihmuan nga banorët vendas, pasi u përballën me një operacion të ndërlikuar për nxjerrjen e kafshës së pikëlluar nga pusi. Leopardi u qëllua me një thumb qetësues para se veterineri Bijoi Gogoi të zbriste 30 metra poshtë në fund të pusit, për ta nxjerrë leopardin me një litar.
Më pas kafsha u pastrua mirë. Leopardi nuk kishte pësuar lëndime nga incidenti dhe më pas u dërgua në kopshtin zoologjik të Assam State. Shpëtimi i kafshës vjen pas një sërë incidentesh mes njerëzve dhe leopardëve në zonë, teksa njerëzit hyjnë në habitatin natyror të pyllit të madh. TIRANA TODAY
