Stuhitë e ditëve të fundit kanë përpirë gjithë rërën e plazheve të zonës së pyllit të Sodës dhe të Zvërnecit në Vlorë. Por dallgët kanë shkuar e janë përplasur edhe me pyllin e pishave duke hedhur përtokë rreshtat e parë. Pamjet që nuk kanë nevojë për koment tregojnë tërbimin e natyrës. Sipas ekologjistëve, mushkëria e qytetit të Vlorës po zvogëlohet me shpejtësi të madhe, pasi deti po merr çdo vit thuajse 10 metra të plazhit dhe të pyllit.
Por edhe banorët e Vlorës kanë pjesën e tyre të fajit. Ata e kanë kthyer këtë hapësirë në vend depozitimi mbeturinash, sidomos inertesh. Ekologjistët thonë se për pak vite plazhi dhe pylli i Sodës mund të zhduken. Pylli është jetik për Vlorën, i jep ajër, mundësinë e eko-turizmit, i shton një park unik qytetit.
Situata e krijuar kërkon ndërhyrje emergjente. Vetëm barrikadat, mbjellja, pastrimi dhe mbrojtja me ligj, duke e shpallur zonën park kombëtar mund ta shpëtojë pyllin e Sodës. TIRANA TODAY
