Guvernatori i Bejrutit, Marwan Aboud, njoftoi se rreth 300 mijë persona kanë mbetur të pastrehë, pas shpërthimit të fuqishëm që u regjistrua dje.
Sipas tij, kostoja e vlerësuar e shpërthimit është diku midis 3-5 miliardë dollarë, pasi dëmet përhapen deri në gjysmën e qytetit.
Presidenti Michel Aoun bën me dije se vendi do të mbajë tre ditë zie, duke filluar që nga sot. Ai shtoi se qeveria do të lëshojë 100 miliardë lira (50.5 milionë euro) fonde të urgjencës.
Kryeministri libanez Hassan Diab foli dje për një sasi të konsiderueshme nitrati të amonit që ndodhej nën sekuestro prej vitesh në disa magazina afër portit, rreth 2750 tonelata.
Por nga ana tjetër, disa ekspertë amerikanë me eksperiencë në shpërthime të këtij tipi, nuk janë të bindur se kjo lëndë është shkaku kryesor i tragjedisë.
“Ai tymi ngjyrë rozë në të kuq nuk përkon me nitratin e amonit”, tha për CNN Tony May, ekspert i lëndëve plasëse.
Sipas ekspertit, prania e atij elementi duhet të shoqërohej me një ngjyrë të verdhë. Këtë e mbështet edhe një ish-agjent i CIA-s, Robert Baer, i cili thotë se në fillim të videos shihet një substancë që mund edhe të jetë nitrat amoni që po digjet, por më pas shpërthimi kishte natyrë tjetër.
“Shihni topin e zjarrtë të gjeneruar, ngjyrë portokalli, është padyshim diçka e lidhur me eksploziv ushtarak”, theksoi ai.
