Fundjavë Ndryshe ka nisur një fushatë për të ndihmuar familjet në këtë fundvit të ftohtë. Janë plot 81 soba druri, të financuara nga Raiffeisen Bank, të cilat do të shpërndahen në 5 qarqe të vendit.
Fundjavë Ndryshe ka nisur shpërndarjen e tyre në familjet në nevojë ekstreme, të cilat nuk kanë mundësi për të siguruar një të tillë.
Sot, të rinjtë e Fundjavë Ndryshe kanë qenë në Shkodër, ku kanë dhuruar disa nga sobat e drurit, duke u ardhur në ndihmë familjeve në nevojë në këto ditë të ftohta dimri.
Fondacioni ka publikuar disa foto në faqen zyrtare në Instagram dhe në Facebook, ku kanë dhënë lajmin e gëzuar për 81 familje në këtë fundvit.
“Nis shpërndarja e 81 Soba për shumë familje në nevojë ekstreme në 5 qarqe të vendit. Familje të cilat janë në pamundësi për ta siguruar një të tillë.
Në këtë fundvit i’u urojmë familjeve në nevojë një dimër më të ngrohtë “Bamirësia nuk të varfëron”, shkruhet në faqen e Fundjavë Ndryshe në Instagram.
Fundjavë Ndryshe ka publikuar edhe disa foto nga shpërndarja e sobave në Shkodër, ku shkruan:
“Shkodër. Ti gëzoni familjarë të nderuar sobat nga Raiffeisen Bank Shqiperi. Babagjyshi këtë vit solli atë që ishte e domosdoshme, në mënyrë që ky vit të na gjejë shendosh dhe ngrohtë. Bamirësia nuk të varfëron.”
