Sekretarja e Trump-it është dëbuar nga një restorant, vetëm për një arsye mjaft të thjeshtë, pasi punon për presidentin.
Bashkëpronarja e “Red Hen” në Lexington të Virginias, i kishte kërkuar Sekretares për Shtypin në Shtëpinë e Bardhë, Sarah Sanders dhe familjes së saj, të largoheshin, në shenjë proteste kundër administratës “Trump”. Sipas postimit të Sanders në “Twitter”, “veprimet e bashkëpronares flasin më shumë për të, sesa për mua”.
Stephanie Wilkinson e ka argumentuar veprimin e saj me besimin se Sanders punon për një administratë “çnjerëzore dhe joetike”. Duke folur për “Washington Post”, ajo thotë se i kërkoi zëdhënëses së presidentit Trump të largohej nga tryeza e rrumbullakët me 26 karrige në restorantin e saj, pasi e kishte konsultuar më parë me stafin këtë vendim.
“Më thoni se çfarë dëshironi që të bëj me të. Mundem t’i kërkoj edhe të largohet”, iu është drejtuar pronarja pjesëtarëve të stafit, të cilët menjëherë i kanë thënë “po”, sipas rrëfimit të saj.
