Një politikane kurde, shoferi i saj dhe tetë qytetarë u qëlluan për vdekje në një autostradë, pasi u nxorën nga makinat e tyre nga militantë të mbështetur nga Turqia, të cilët kishin kaluar kufirin, ndërsa vazhdonin që të ecnin nëpër Siri. Lajmin e bën të ditur Observatori i të Drejtave të Njeriut në Siri.
“Nëntë civilë janë ekzekutuar në momente të ndryshme në pjesën jugore të qytetit Tal Abyad”, tha Vëzhguesi Sirian për të Drejtat e Njeriut. Sipas forcave kurde, në mesin e personave të vrarë ndodhet edhe 35-vjeçarja Hevrin Khalaf.
Mësohet se Khalaf është ekzekutuar nga grupet mercenare të mbështetura nga Turqia. Përmes një deklarate, Forcat Demokratike Siriane pohuan se para ekzekutimit, 35-vjeçarja është nxjerrë nga vetura, raporton “The Guardian”.
“Kjo është dëshmi e qartë se shteti turk po vazhdon politikën kriminale kundër civilëve të paarmatosur”, thuhet në deklaratë.
Khalaf ishte sekretare e përgjithshme e partisë “E Ardhmja e Sirisë”. Mutlu Civiroglu, njohës i politikës kurde, u shpreh se vdekja e saj është një humbje e madhe.
