Vetëm pak javë pas krijimit gjatë muajit Prill 2017, fondacioni “Lorik Cana 5” ka nisur zyrtarisht misionin në mbështetjen e sportit për fëmijët dhe të rinjtë, promovimin e kulturës dhe trashëgimisë kombëtare.
Programi i parë i’u dedikua aktivitetit sportiv për moshat parashkollore nga 3 deri më 7 vjeç, me instalimin e një fushe multi-funksionale në Kopshtin Nr. 64, te ish-fusha e aviacionit në Tiranë. Një projekt që nis në kryeqytetin e shqiptarëve, me synimin për tu përhapur më pas në të gjitha trojet shqiptare në Kosovë dhe Maqedoni. “Kisha katër vjet që po mendoja të bëja fondacionin tim për të dhënë vlera që i ndihmojnë njerëzit, që i përfaqësojnë dhe që i lidhin me njëri-tjetrin. Sigursht për të nisur, Tirana është kryeqyteti i të gjithë shqiptarëve. Fondacioni do të shtrihet në të gjitha trojet shqiptare, në Shqipëri, Kosovë dhe shpresojmë në të ardhmen në Maqedoni, për ti mësuar fëmijëve tonë të rriten me vlerat e duhura. Më e rëndësishme se struktura, e cila nuk është e madhe, më i rëndësishëm është çfarë brumi ka brenda, çfarë programi do të ketë për fëmijët”, tha Cana.
Përkrah ish-kapitenit kuqezi, që ëhstë themelues dhe president i fondacionit, i pranishëm në inaugurim ishte edhe kryebashkiaku i Tiranës, Erion Veliaj, i cili vlerësoi projektin dhe premtoi mbështetje.
