Emigrantët shqiptarë që jetojnë jashtë vendit kanë nisur të kthehen në atdhe për të kaluar pranë familjeve të tyre festat e fundvitit.
Hyrjet më të shumta gjatë kësaj fundjave janë shënuar në Pikën Kufitare të Kakavijës dhe Kapshticës. Numri pritet të rritet ndjeshëm në ditët e ardhshme, kur emigrantët marrin pushimet dhe kjo gjë pritet të shkaktojë radhë të gjata në pikat kufitare.
Gjatë ditës së shtunë, vetëm në Kakavijë kanë hyrë 6900 emigrantë, duke shënuar një fluks pesëfish më të lartë krahasuar me ditët e zakonshme. Ndërkohë, një numër i lartë hyrjesh është shënuar dhe në Kapshticë, ku mësohet se në total gjatë ditës së shtunë kanë hyrë 6896 persona. Ndërkohë, në portin e Durrësit ky numër ka qenë rreth 6600 persona, por në ditët e ardhshme pritet të rritet ndjeshëm. Nga ana tjetër, porti i Vlorës ka pasur një fluks shumë të vogël prej 360 personash. Në total, në këto katër pika kanë hyrë rreth 20 mijë persona vetëm gjatë ditës së diel.
DURRES
Vetëm gjatë ditës së djeshme mbërritën në portin e Durrësit shtatë tragete të linjave Bari-Durrës, AnkonaDurrës, me rreth 6.600 persona dhe 2200 mjete. Për shkak të fluksit, agjencitë e udhëtimit kanë marrë masat e nevojshme duke urdhëruar që tragetet të bëjnë dopio korsë, me qëllim përballimin e numrit të lartë të emigrantëve që kthehen në atdhe për të kaluar festat e fundvitit.
Përpunimi i tyre në portin e Durrësit është kryer në mënyrë shumë të shpejtë, pasi Policia Kufitare ka shtuar personelin dhe numrin e sporteleve. Sipas burimeve nga Policia Kufitare, gjatë ditëve të fundvitit, por edhe gjatë ditëve të para të muajit janar që përkon edhe me kthimin e emigrantëve në vendet e tyre të punës, do qëndrojnë të dyfishuara sportelet dhe numri i personelit. Pika Kufitare e Durrësit shfrytëzohet edhe nga shtetasit kosovarë dhe ata maqedonas, që e shfrytëzojnë si pikë tranziti.
Ditën e djeshme, mbërritën në portin e Durrësit fillimisht tri tragete të linjës Bari-Durrës dhe një traget nga Ankona, ndërkohë gjatë orëve të vona të mbrëmjes mbërritën edhe tri tragete nga Bari, të cilat u kthyen nga dopio korsë. Me katër tragetet e para mbërritën 5600 udhëtarë dhe 1700 automjete. Ndërkohë që tri tragete, të cilat erdhën më vonë, kishin në bordin e tyre rreth një mijë persona dhe 500 automjete.
Pritet që fundjava e ardhshme të përkojë me pikun e fluksit të emigrantëve, pasi përkon me festën tradicionale të Vitit të Ri, por edhe për faktin se shumica e emigrantëve marrin leje nga punët e tyre.
VLORE
Deri tani Porti i Vlorës ka pasur një numër të ulët personash që kanë hyrë në Shqipëri. Gjatë ditës së shtunë, 365 persona kanë mbërritur me tragetin e linjës VlorëBrindizi. Fluksi pritet të rritet kryesisht pas datës 24 dhjetor, ditë në të cilat ashtu si edhe vitet e shkuara është shënuar një numër më i lartë mbërritjesh në portin e Vlorës. Kryesisht emigrantë, të cilët jetojnë dhe punojnë prej vitesh në Itali, zgjedhin të mbërrijnë pranë të afërmve të tyre për të kaluar festat e fundvitit.
Sipas asaj çfarë bëhet me dije nga porti i Vlorës, konfirmuar edhe nga shifrat e regjistruara, këtë të diel numri i personave të mbërritur është më i lartë se në ditët e zakonshme dhe kjo reflektohet edhe me rritjen e fluksit gjatë ditëve të fundit të muajit dhjetor. 365 persona dhe 50 automjete janë shifrat e regjistruara këtë fundjavë në portin e Vlorës, ndërsa pritet një numër më i lartë në ditët në vijim, referuar edhe prenotimeve të bëra gjatë këtyre ditëve.
Pas datës 24 dhjetor deri në datë 30 dhjetor pritet një numër më i lartë mbërritjesh në portin e Vlorës. Referuar këtij fakti, burime portuale kanë konfirmuar edhe shtim të personelit gjatë ditëve në vijim, për të shmangur radhët e gjata që mund të krijohen gjatë kësaj periudhe. Faktikisht, ditët e fundit të vitit, referuar periudhave të shkuara, kanë shënuar edhe radhë të gjata në pritje të personave dhe shtetasve që mbërrijnë nga Italia, ndaj dhe personeli do të shtohet gjatë kësaj periudhe./ Panorama
