Pika e kalimit kufitar të Morinës po përballet me një fluks të madh qytetarësh kosovarë, të cilët janë nisur drejt Shqipërisë.
Shkak për këtë fluks dyshohet të jetë temperaturat përvëluese që kanë përfshirë rajonin këto ditë, duke i shtyrë kosovarët drejt zonave bregdetare. Ndërsa mediat kosovare shkruajnë se shkak për këtë fluks është bërë edhe festa e Bajramit, ku kosovarë të shumtë kanë vendosur ta kalojnë në Shqipëri.
Sipas Gazeta Express, bëhet e ditur se që nga ora 05:00 e mëngjesit të kësaj të shtunë kanë hyrë 2,463 mjete me 12,486 shtetas. Përballë këtij fluksi policia kufitare e Morinës ka ngritur traun e doganës duke operuar me procedurë të përshpejtuar.
Ndërkohë fluks të lartë pati edhe në hyrje për në Kosovë. Ndryshe nga Morina, që operon me procedurë të përshpejtuar, dogana e Kosovës, po punon me procedurë standarde të verifikimit të dokumenteve, duke sjellë në jo pak raste vonesa dhe radhë të gjata, sidomos gjatë mbrëmjes, kohë e kthimit të kosovarëve nga bregdeti shqiptar.
