Florian Marku është kampioni shqiptar i kickbox, i rritur në Greqi. Së fundmi, ai ka dhënë një intervistë për portalin grek gazzetta.gr, ku jep mesazhe paqeje për të dyja vendet.
Ai tregon se mësuesit e tij të kickbox-it i ka konsideruar përherë si një familje dhe se nuk ka ndjerë asnjëherë racizëm. Marku tha se ndihet gjithnjë krenar për faktin se është shqiptar, por do u jetë gjithnjë mirënjohës grekëve që e ndihmuan të realizonte ëndrrën e tij. Lidhur me ngjarjen e së dielës, ku u vra një minoritar grek, Marku tha se “një shtet nuk mund të varet nga një person i vetëm”.
Intervista e Markut:
Prej sa vitesh jetoni në Greqi? A keni ndeshur ndonjëherë me racizëm ndaj jush? Cilat janë përvojat me miqtë tuaj?
Unë jam nga Shqipëria. Nuk kam hasur kurrë në racizëm, kam qenë gjithmonë e mirëpritur në Greqi dhe Austri. Unë u rrita në Greqi. Familja ime jeton këtu. Kam filluar kampionatin në Greqi me mësues grekë, që janë si familja ime. Kurrë nuk e kam ndierë në Greqi faktin që jam nga një vend tjetër.
Me ndeshjet tuaja në kickbox, mendoni se do të bashkoni dy popujt?
Ky është gjithmonë motivi im, t’u tregoj të gjithëve se nuk kemi asgjë për të ndarë. Kjo është dhe arsyeja pse unë ngre në ring dy flamujt (atë shqiptar dhe atë grek) pas një fitoreje.
Çfarë mesazhi doni të përcillni?
Jam i lumtur që shumë grekë më kanë mbështetur në këtë rrugë. I falenderoj dhe u shpreh mirënjohjen time. Në Shqipëri ne kemi mësuar që të mos jemi mosmirënjohës ndaj atyre që na kanë ndihmuar, prandaj vazhdoj t’i falenderoj ata dhe të ngre flamurin shqiptar dhe grek.
Janë thënë deklarata ekstremiste për incidentin që ndodhi me minoritarin grek i cili u vra. Cila është pikëpamja juaj?
Një shtet nuk mund të varet nga një person i vetëm dhe të ndryshojë mendimi i gjithë shoqërisë. Rrjedha e viteve ka treguar se ne jemi të kënaqur me njëri-tjetrin dhe nuk ka racizëm.
Mundet sporti të luftojë racizmin?
Sporti mund të ndryshojë shumë gjëra dhe të ndikojë pozitivisht në një situatë.
A janë forcuar marrëdhëniet mes dy vendeve përgjatë viteve?
Unë besoj se po. Unë jam nga Shqipëria, jam krenar për këtë, por nuk do të rresht kurrë së falenderuari Greqinë.
